هاملت ولكن بالمصرى(الجزء الثانى)

لو كنتم لسة مصممين ونفسكم طويل اتفضلوا

الفصل الثاني
الخطه
راح الواد حماده وأخد العساكر وعمرو وحلفهم إن مفيش حد يجيب سيره باللي حصل .
وقعد مع عمرو علي المسطبه يفكر" اعمل ايه واسوي ايه ".

راح قال حماده لعمرو اسمع احنا نعمل عرض الارجوز بمقتل ابوي العمده.وكده لوعمي وشه جاب الوان يبقي هو اللي عملها بجد ..والعفريت صادق.. أحنا نجيب فرقه الارجوز من القريه اللي من الناحيه الغربيه ونتقابل في الدكان بكره .

اتفق حماده مع فرقه الارجوز انهي تعمل مشهد مقتل الارجوز اقصد العمده من اخوه بكوبيه الشاي . وراح حماده يراقب تعبيرات وش عمه وامه . راح لاقي عمه وشه اتقلب لما الارجوز شرب السم راح ساب القاعه ومشي وهنا بقي اتأكد حماده ان عمه قتل ابوه.

كان حماده بيحب البت بنت شيخ الغفر جمالات .. وكانت جمالات جمالها رباني مش بتحط الاحمر والابيض .. ولا عمرها ماحطت ميه أكسوجين علي شعرها علشان تكون شبه شكيرا..ولا حطت بطاس علي شعرها علشان يكون مفرود .. المهم البت كانت حلوه وخلاص وكفايه كده علشان منأخدشي ذنوب.

وكان ابو حماده قاري فاتحه مع شيخ الغفر "حسونه" .يعني حماده لجمالات..

المهم بعد عرض الارجوز .راحت الست توحيده مناديه شيخ الغفر في حجره المسافرين .. وقعدت تتكلم معاه عن جمالات و حماده وان حماده مش عاجبها ولاتصرفاته دي تعجب حد راح شيخ الغفر قايلها طيب متجوزيه جمالات علشان يعقل ..وهما في وسط الكلام راح حماده مخبط علي الباب زي القضي المستعجل وعايز يقابل امه ..راحت امه مخبيه شيخ الغفر ورا الستاره ..

دخل حماده الحجره وهو هيتجنن من عمه وقعد يشتم في عمه و يقول انه قاتل وانه لازم يقتلو .. راح حماده شايف خيال ورا الستاره راح افتكره عمه .. وراح مطلع المطوه اللي معاه و راح دببابها في الستاره .
طبعا امه صوتت وراح هو زايح الستاره لاقي شيخ الغفر .. وقعد شيخ الغفر يقول نشنت ياناصح ويدعي علي حماده ان ربنا يأخذه لاحد ما روحه طلعت ...

طبعا الموضوع الترمخ لان العمده واصل .وطبعا محبيش يعمل فضايح راح رايح لشوقي ابن حسونه ووعده بمنصب شيخ الغفر وقاله انه هيخليه يأخد طاره

بس يحاول يعمل انه مسامح حماده لحد ميظبط الدنيا .
طبعا في القرافة كان الحزن مغيم خالص واتخاتق شوقي مع حماده وانتهت بالصلح لما العمده فتحي قالهم انهم متربين سوي وان هم اخوات وان حماده مكنشي قصده .. وراح كل واحد لحال سبيله ..

جمالات بنت شيخ العمده كانت قاعده حزينه فوق شجره التوت اللي علي الترعه . البت مستقبلها ضاع حبيبها قتل ابوها ,واخوها هيقتل حبيبها طيب هي تعمل ايه .ايه الغم ده وهي قاعده بتفكر راحت رجليها متزحلقه واقعه في الترعه وغرقت.
طبعا حماده زعل جدا عليها وحس انه السبب في موت الناس دي , وان عمه هو القاتل الحقيقي لانه بسببه كل الناس دول ماتو . وراح قال انو لازم يقتل عمه انتقاما لحبيبته .


__________________

يقتل عمه انتقاما لحبيبته بس؟؟؟؟؟؟؟؟
ده مفروض يقتل نفسه انتقاما لحبيبته ولشيخ الغفر ولهاملت ولينا كمان
حسبى الله ونعم الوكيل
انا رايح للجزء التالت يا عم
انا مستعجل على نهاية الواد العبيط ده