هاملت ولكن بالمصرى (الجزء الاول)

إلى كل محبي شكسبير ورواياته الجميلة أحب أن أقدم لكم رواية هاملت ولكن بالمصري ...... ارجو ان يعجبكم واحب ان اعرف رأيكم

نتعرف الاول على شخصيات الرواية الكبيرة

الشخصيات

1-حماده
2-أبو حمادة
3-توحيده أم حمادة
4-فتحي العمدة الجديد
5-جمالات
6-عمرو صاحب حمادة
7-حسونة شيخ الغفر
8- صبحي وعصران عساكر
9-شوقي

وتتكون الرواية من ثلاثة فصول اتمنى ان تنال اعجابكم

أستر يارب ( مش عارف ليه حاسس انى هاتوقف بعد الموضوع دة)

نبدأ على بركة الله

الفصل الاول

البحث عن الحقيقه

بعد صلاه العصر كان الواد حمادة مريح فوق سطوح الدار. وكان شكله زعلان جدا.. .بصراحه كل الكفر لاحظ ان حماده سلوكه أتغير وبقي حاله يقطع القلب. بعد ما كان رمز الشياكه في الكفر . كان حماده ابن العمده السابق كان من القليلين في الكفر اللي بيحطو جل على شعره.. كان داير في الكفر بالفزبه بتاعته يعاكس في حريم مدرسه الثانوي.

اللي كان قالب حاله انه كان شاكك ان ابوه مات مقتول و مماتشي بازمه قلبيه زي دكتور الوحده ماقال ..بس ازاي يثبت ان ابوه مات مقتول ..واللي كان قاهر الواد حماده ان امه توحيده اتجوزت من عمه فتحي . وعمه فتحي ده راجل مفتري بياكل حقوق الناس . وانه اتجوز امه بعد ست شهور .. وان امه محترمتشي سنويه ابوه .

كان في أشاعه في الكفر بتقول أن في عفريت بيطلع في الغيط بعد العشا كده علي الساعه تسعه (9) باليل ..وبيقعد ينادي "حماده ياحماده أنت فين ياواد"

راح صبحي و عصران عساكر الكفر قالوا لحماده علي الموضوع ده. راح حماده واخذ الاثنين عساكر وصاحبه الانتيم عمرو وراحو الغيط .
فعلا الساعه تسعه (9) بالليل سمعو صوت بينادي" ياحماده ياحماده أنت فين ياواد"
راح حماده قايل للناس اللي معاه استنو هنا وانا هاروح اشوف العفريت ده عايز ايه واجي "
مشي حماده في الغيط وسط صراصير الغيط و فيران الغيط لحد مطلعو العفريت.

حماده: "اااالللسلاممممووو ععلللليكككووو .. أأأنت عايز ايه مني"
العفريت: "أيوه يــاحماده يابني انا ابوك "
حماده: "ايوه يابا ازيك و ازي صحتك انت عامل ايه وحشني والله .شوفت عمايل امي واخوك -عمي -يعني .. المهم انت وحشني يابا .. ازيك كده و ازي صح....."
العفريت مقاطعا :" اسكت ياواد ياأهبل يابن الأهبل انا جيت احذرك من ورثك وتخلي بالك من امك علشان هي عبيطه زيك وعلي نيتها . وتخلي بالك من عمك لانه هو اللي حطلي سم الفيران في كوبايه الشاي واحنا قاعدين علي المسطبه ."

حماده :"طيب يابا وانا اعمل ايه ؟!!"
العفريت:"تاخد طار والدك ياوله وترفع راسك في الكفر انا لازم امشي دلوقتي علشان الوقت اتأخر سلامو عليكم"
حماده:"سلام يابه سلام وابقي سلم علي جدي و ستي الحاجه سلام يابا"

برااااااااااااافو يا حمادة!!!!!
قصدى يا رومانسى
انا هروح أقرا الجزء التانى بسرعة أهوه
ملحوظة صغيرة
أنا بس مقرتش هاملت قبل كده بس كفاية عليا هاملت المصرية
يلا بقى علشان أروح أقرا الجزء التانى

» هاملت ولكن بالمصرى(الجزء الثانى)
» هاملت ولكن بالمصرى(الجزء الثالث)
» حب الزعيم (الجزء الاول)
» حب الزعيم (الجزء الثانى)